Snæfellsstofa er gestastofa fyrir austursvæði Vatnajökulsþjóðgarðs og upplýsingamiðstöð. Í Snæfellsstofu er sýningin Veraldarhjólið sem fjallar um hringrás og mótun náttúrunnar. Sýningin leggur áherslu á samspil gróðurfars og dýralífs á austursvæði þjóðgarðsins. Við hönnun hennar var lögð áhersla á að börn gætu snert, lyktað og prófað sig á ýmsum sýningarmunum.

Minjagripaverslun er í gestastofunni með áherslu á vörur úr heimabyggð og nágrannasveitum þjóðgarðsins. Einnig er hægt að kaupa sér kaffi, kökur og ís. Gestastofan er staðsett á Skriðuklaustri rétt sunnan við afleggjarann upp á Snæfellsöræfi. Aðgengi er fyrir fatlaða.

Snæfellsstofa var opnuð sumarið 2010 og er hún fyrsta vistvænt vottaða bygging landsins samkvæmt breska umhverfisstaðlinum BREEAM.

Vatnajökulsþjóðgarður er einn stærsti þjóðgarður í Evrópu, um 14.000 km2. Sérstaða hans á heimsvísu felst í fjölbreytilegum landslagsformum sem samspil eldvirkni og jökla hefur skapað.